علقت الإعلامية ياسمين نور الدين على تصريحات سمية الخشاب عن التعليم والتي وجهتها لطلاب الثانوية العامة خلال فترة إمتحاناتهم الحالية، حيث قالت: "التعليم مابيحددش لا مصير ولا نيلة بتعرف تجيب فلوس هتعرف تتجوز وتسافر مبتعرفش يبقى الشهادة هتقرطسها وتحط فيها طعمية"، وهذا ما جعل ياسمين نور الدين تهاجمها من خلال برنامجها جروب الماميز.

ياسمين نور الدين تهاجم سمية الخشاب بعد تصريحاتها عن التعليم

هاجمت ياسمين نور الدين الفنانة سمية الخشاب من خلال برنامج جروب الماميز، رصده لكم موقع تحيا مصر وأوضحت أنها انتظرت أسبوع حتى يتسنى لـ سمية الخشاب الاعتذار أو توضيح سبب التصريح، ولكن لم يحدث شيء من هذا القبيل، وقالت: "سمية الخشاب كتب على صفحتها بوسائل التواصل الاجتماعي كلام المفروض يعني أنها من خلال بتساند طلاب الثانوية العامة، ليه كده يا فنانة بجد ده إحنا بنظم العيال عشان يتعلموا في زمن نجومية الفن التافه".

وتابعت ياسمين نور الدين مهاجمة سمية الخشاب، قائلة: "زمن صعود أصحاب اللا قيمة والغنى الفاحش للاعيبة كرة بيتباعوا بالملايين وهما بلا إنجاز حقيقي يرفع اسم بلادهم ولا حتى يبسط الناس ليه كده يا مدام سمية عملك إيه التعليم عشان يبقى بالنسبة لك الفلوس أهم منه وبلاها بقى التعليم"

ياسمين نور الدين لـ سمية الخشاب: إيه سقف الطموح اللي خبط في راسنا

واستنكرت ياسمين نور الدين ربط سمية الخشاب سقف طموحها بالزواج والسفر، وقالت: "إيه سقف الطموح اللي خبط في راسنا ده تتجوز وتسافر هو ده الطموح خلاص مفيش أكتر من كده يعني مفيش مثلًا يبقى ناجح أو سعيد أو صاحب إنجاز وبتأثر في الإنسانية، تخيلي أنتي كده يا مدام سمية أن السوشيال ميديا دي كانت أيام الدكتور زويل الطالب في كلية العلوم جامعة الإسكندرية، يشوف ممثلة المفروض أنها مشهورة كاتبة كلام زي ده، وقتها هيقول خلاص بقى بلاها تجارب وتعليم ووقتها الإنسانية كلها هتخسر أحمد زويل وإنجازاته إنسانية عظيمة".

وأكدت ياسمين نور الدين أن المال بدون قيمة لا يساوى أي شيء، مستشهدة ببلدان لديها المال ولكن لا يوجد لديها قيمة أو حضارة، قائلة: "الفلوس من غير القيمة ولا حاجة بلاد كتير عندها فلوس كتير بس تعليمها في الحضيض وبتفضل قليلة مالهاش قيمة، في بلاد لما بقى معها فلوس صرفتها على التعليم عشان هو ده اللي هيعملها قيمة حقيقية ويخليها صاحب تقدير وإنجاز وحضارة".

ياسمين نور الدين: الموضوع مش خناقة بين العلم والفلوس

وعن تصريح سمية الخشاب بشأن عمل شهادة التعليم "قرطاس طعمية" قالت ياسمين نور الدين: "قرطاس الطعمية مقطوعة من كتب مدرسية قديمة ولو معندكش علم ممكن الناس تموت لأن في ناس بيكون عندها أمراض، واللي اكتشف ده العلم مش حاجة تانية الموضوع مش خناقة بين العلم والفلوس زي ما سمية الخشاب بتقول.. الصراع شهير وأزلي بين  القيمة واللا قيمة".

واختتمت ياسمين نور الدين حديثها عن تصريحات سمية الخشاب مؤكدة أن هناك العديد من الفنانين ولكن على الرغم من تقديمهم أعمال فنية فهي بلا قيمة ولا يوجد لهم أدوار محفورة في ذاكرة المشاهد ولم ينالوا عليها جوائز ترفع اسم بلادهم كما أنه لا يوجد لهم أثر في حياة الجمهور من خلال أعمالهم الدرامية، وقالت: "عندي عتاب كبير جدًا على سمية الخشاب وعلى أي حد صاحب عدد كبير من المتابعين وينشر الكلام ده"